උතුරුමැද පළාත් ආයුර්වේද කොමසාරිස්‌ වෛද්‍ය එල්. සී. යූ. කුමාර අල්විස්‌ මහතාගේ නිල නිවසට 22 දා අලුයම 4.50 ට පමණ පැමිණි නාඳුනන පුද්ගලයන් දෙදෙනකු ඒ මහතාට ඇසිඩ් ප්‍රහාරයක්‌ එල්ලකර පලා ගොස්‌ ඇත.ඇසිඩ් ප්‍රහාරයෙන් ඒ මහතාගේ මුහුණ සහ පපු ප්‍රදේශය දරුණු ලෙස පිළිස්‌සුම් තුවාල සිදුවී ඇත. ප්‍රතිකාර සඳහා ඒ මහතා අනුරාධපුර ශික්‌ෂණ රෝහලට ඇතුළත් කරනු ලැබුණු අතර, අනතුරුව දෑස්‌වලට සිදුවී ඇති තුවාලවලට ප්‍රතිකාර කිරීම සඳහා කොළඹ ඇස්‌ රෝහල වෙත රැගෙන යන ලදී.


නීතිගරුකව සිය රාජකාරිය අකුරටම ඉෂ්ට කරන නිලධාරියකු ලෙස ප්‍රසිද්ධියක්‌ උසුලන වෛද්‍ය කුමාර අල්විස්‌ මහතා අසරණ රෝගීන් වෙනුවෙන් සිය ජීවිතය කාලයම වෙන් කළ අයකු ලෙස කීර්තියක්‌ දිනා ඇත.
නීතිය අකුරටම ක්‍රියාත්මක කිරීම නිසා ඒ මහතා සමඟ උරුණ වූ කිසියම් පිරිසක්‌ මෙම ඇසිඩ් ප්‍රහාරය එල්ල කරන්නට ඇති බවට පොලිසිය සැක පහළ කරයි.
ප්‍රතිකාර ගැනීමට අසාධ්‍ය රෝගියකු පැමිණියහොත් දවසේ ඕනෑම වේලාවක
ඒ සඳහා ඉදිරිපත් වීම අල්විස්‌ මහතාගේ ප්‍රතිපත්තියක්‌ බව ආයුර්වේද රෝහල් කාර්ය මණ්‌ඩලය පවසයි.
ඊයේ අළුයම 4.50 ට පමණ ඒ මහතාට ඇසිඩ් ප්‍රහාරය එල්ල කළ පුද්ගලයන් ද නිල නිවසට පැමිණ ඇත්තේ ප්‍රතිකාර ගැනීම සඳහා රෝගියකු රැගෙන ආ බව කියමින්ය.
ඇසිඩ් ප්‍රහාරය එල්ලවූ අවස්‌ථාවේ කුමාර අල්විස්‌ මහතාගේ බිරිඳ වන වෛද්‍ය අල්විස්‌ මහත්මිය ද නිවසේ සිට ඇත.
 ඇසිඩ් ගැසූ අපරාධකරුවන් දෙදෙනා ඇල්ලීම අනුරාධපුර කොට්ටාශ අපරාධ විමර්ෂණ අංශයේ ස්ථානාධිපති පොලිස් පරීක්ෂක ආර්.එම්.අයි.බී. රත්නායක මහතාට භාර දී තිබේ.
රත්නායක මහතා ඉතා දක්ෂ අපරාධ විමර්ෂකයකු වශයෙන් නමක් දිනා සිටින අයෙකි. ඔහු වෙත ඇසිඩ් ප්‍රහාරයේ ඉදිරි පරීක්ෂණ භාර දී තිබෙන්නේ උතුරුමැද පළාත් භාර ජ්‍යෙෂ්ඨ පොලිස් අධිකාරි ජගත් අබේසිරිවර්ධන මහතා විසින් ය.
ඉදිරි දින දෙක තුන ඇතුළත ඇසිඩ් ප්‍රහාරය සම්බන්ධ වූ සියලුම අපරාධකරුවන්   රත්නායක මහතා විසින් අත්අඩංගුවට ගනු ඇතැයි විශ්වාස කෙරේ. මෙය වෘත්තීය පළිගැනීමක්ද, නැත්නම් රාජකාරි මට්ටමින් ඇති වූ පළිගැනීමක්දැයි යන කරුණු දෙක කෙරෙහි විශේෂ අවධානය යොමුකර පරීක්ෂණ ආරම්භ වී තිබේ.